ភ្នំពេញ៖ ក្រសួងធនធានទឹក និងឧតុនិយម បានបញ្ជាក់ថាចាប់ពីថ្ងៃទី២២-២៨ ខែកុម្ភៈ ឆ្នាំ២០២៣ កម្ពុជាទទួលឥទ្ធិពលពីទ្រនុងសម្ពាធខ្ពស់ (ចិន) និងខ្យល់មូសុងឦសានក្នុងកម្រិតពីខ្សោយទៅមធ្យម ដែលអាចធ្វើឱ្យតំបន់ខ្លះមានភ្លៀងធ្លាក់ និងចុះត្រជាក់នាពេលព្រឹកនិងពេលយប់។

ក្រសួងបានឱ្យដឹងថា ស្ថានភាពបែបនេះនឹងធ្វើឲ្យតំបន់ទំនាបកណ្តាល សីតុណ្ហភាពអប្បបរមា មានពី ២០ ដល់ ២២ អង្សា និងអាចមានភ្លៀងធ្លាក់តិចតួច ហើយនៅថ្ងៃទី២៦-២៧ ខែកុម្ភៈ សីតុណ្ហភាពអប្បបរមាអាចចុះត្រជាក់បន្ថែម ក្នុងចន្លោះពី ២-៣អង្សា នៅវេលាព្រឹកនិងយប់ ។

រីឯតំបន់ខ្ពង់រាបសីតុណ្ហភាពអប្បបរមា មានពី១៩ ទៅ២១អង្សា ហើយនៅថ្ងៃទី២៦-២៧ ខែកុម្ភៈ សីតុណ្ហភាពអប្បបរមាអាចចុះត្រជាក់បន្ថែមក្នុងចន្លោះពី ៣-៤អង្សា នៅវេលាព្រឹកនិងយប់ លាយឡំនឹងខ្យល់បក់ក្នុងកម្រិតមធ្យម។

ដោយឡែកតំបន់មាត់សមុទ្រសីតុណ្ហភាពអប្បបរមា មានពី២០ ទៅ២២អង្សា និងអាចមានភ្លៀងធ្លាក់តិចតួច៕